Actividade de titoría- Histoires de conso

Esta actividade está deseñada para un grupo de 1º Bach. nunha sesión de cincuenta minutos e ten por obxectivo concienciar ao alumnado sobre o consumo de alcohol. Antes de explicala, hai que aclarar que para o correcto desenvolvemento da sesión precísase o apoio do orientador do centro, posto que terá máis información sobre este tema cá nós.
Como ben indica o título, Histoires de conso (Historias de consumo), trátase dun xogo no que cada alumno debe imaxinar un escenario de consumo de alcohol. Explícome:
No encerado haberá un total de seis campos de diferentes cores, cada un representa un factor (número de cubatas, humor, contexto, xénero, comida, bebida)que afecta á hora de consumir alcohol.

Cada un dos campos conta cun número de tarxetas que o alumno/a debe empregar para crear ese escenario (unha tarxeta por campo). Esta é a información das tarxetas:
sexe (xénero): femme/homme
repas (comida): pendant le repas, après le repas, a jeun
contexte (contexto): seul, repas de famille, bar/boîte, chez des amis, dehors
humeur (estado de ánimo): triste, en colère, rien de spécial, stressé, révolté, joyeux
boisson (bebida): mélange, bière, apéritif, premix, boisson sans alcool, alcool fort
nombre de verres (número de vasos ou cubatas): tarxetas 1 verre, 2 verres... (ata 10)

O xogo consiste en que cada alumno saia ao encerado e invente un escenario, o ideal é que sexan variados entre sí para poder ver as diferencias entre eles. Cando están todos os campos completos, o alumno debe responder ás preguntas que lle formule a docente/o orientador. Estas poden ser:

• Paréceche realista esta historia? 
• Como cres que se sinte esta persoa despois de beber? A qué cres que se debe ese estado? Ao seu xénero? Ao seu estado de ánimo? Ao número de vasos que bebeu? Ao contexto? Ao tipo de alcohol? Ao feito de que (non) comeu?
• Se cambiamos un dos factores, cambiaría o escenario? De qué maneira?
• Identifícaste con esta historia?

A través destas preguntas, o obxectivo é que o alumnado reflexione sobre as seguintes cuestións:

• A noción de vaso estándar: diferencias de beber nun bar ou na casa, a capacidade de autoavaliación en canto ao consumo de alcohol, as misturas de alcohol, etc.
• Os mitos sobre o alcohol: as diferenzas entre o home e a  muller á hora de beber alcohol ("O home ten máis aguante", "As mulleres prefiren os cocktails"), as diferentes gradacións de alcohol e os clichés sobre as bebidas ("O viño e a cerveza non suben tanto coma o vodka") e a forma de eliminalos ("Eu vomito e despois sigo bebendo", "Un café e listo")
• A influencia do grupo: A resistencia á presión ("Veña, toma outra"), a competición (xogos de beber), etc.
• A motivación para beber alcohol: curiosidade, búsqueda de sensacións, necesidade de desafiar os límites, desinhibición, xestión do estrés ou o agobio, etc.
• Os niveis de consumo: as primeiras veces, consumo regular ou ocasional, consumo abusivo en festas, as diferentes formas de dependencia, etc.
• Os riscos: vómitos, perda de consciencia e memoria, sobredose (coma etílico), accidentes de tráfico, conduta agresiva e violenta, contaxio de enfermedades venéreas, etc.
• As oportunidades de consumo: momento de socibilizarse, dispoñibilidade de alcohol (venta en supermercados e bares, presencia de bebidas alcohólicas na casa)
• O contexto de consumo: beber só ou en grupo, momento do día no que se bebe, etc.

A docente e o orientador poden retomar un destes elementos citados e propoñer estratexias para reducir os riscos asociados ao consumo de alcohol. Algunhas delas son:

1. Beber auga.
2. Espaciar os días que se bebe alcohol.
3. Inxerir algún alimento cando se bebe alcohol.
4. Buscar alternativas ao consumo de alcohol.

Este xogo pódese adaptar para concienciar ao alumnado sobre outras substancias (marihuana, heroína, cocaína...).

Esta actividade atopeina na páxina web do CRIPS, un centro da rexión Île-de-France dedicado á prevención de enfermidades venéreas e condutas de risco nos xóvenes.
Déixovos aquí a ligazón:http://www.lecrips-idf.net/miscellaneous/animatheque-histoire-conso.htm

Espero que vos gustase!

8ª sesión con Luz

Nesta octava e última sesión coa nosa querida Luz (ímoste botar moito de menos!), comezamos cun warm up.

Consistiu no seguinte: nun papel tivemos que escribir unha pregunta que lle teríamos que facer á toda a clase.

A miña foi “Que vas facer no verán?”

A idea é que o alumnado lle faga a pregunta ao maior número de compañeiros posibles.

Despois, Luz entregounos unha tarxeta a cada un co nome dalguén de clase, do que tiñamos que investigar en base a actividade previa.

É dicir, todos os compañeiros temos algún tipo de información desa persoa, polo exercicio que fixemos previamente.

Esta actividade podería aproveitarse para facer unha redacción ou unha presentación oral.

Despois de facer a nosa derradeira actividade de warm up con Luz, estivemos vendo varios modelos de exame.

Básicamente eran tipos de exercicio moi traballados na clase (use of English, reading comprehension, pequenos writing).

Ensinounos unha páxina web moi interesante para o grupo de inglés. Macmillan Secondary Student’s Website.

Na segunda parte da sesión debatimos varios temas de moito interese para a nosa futura labor como docentes.

Libros de texto/dixital

No meu grupo (Coromoto, Javier, eu) tivemos unha opinión moi parecida. 
Idealmente, gustaríanos poder traballar con materiais novos creados por nós, deixando de lado o libro de texto. Pero se pensamos na cantidade de clases que temos, crear contidos continuamente (aínda que se reciclen) pode convertirse no noso peor pesadelo!
 Pensamos que desde o punto de vista do alumno, ter un libro de texto é moi recomendable porque lles serve de guía, teñen un manual ao que acudir.Como futuros docentes estamos a favor tamén, sobre todo para os primeiros anos, nos que tamén precisaremos dun manual que seguir.

Porén, o libro de texto non debe ser a única fonte de contidos e coñecemento do alumnado, senón que debe complementarse con outros materiais. Ademais, hoxe en día os libros de texto veñen acompañados dunha gran cantidade de recursos para o docente.

Tecnoloxía

Este foi quizais o tema que xerou máis debate. No meu grupo tivemos opinións dispares. Os tres estabamos dacordo en que o uso das TIC por parte do profesor era dunha grande axuda, xa que permite crear materiais novos,sesións máis innovadoras e son de axuda á hora de avaliar. Porén, discrepamos no relativo ao seu uso por parte do alumno. Para Coromoto, o uso de aparellos electrónicos (móbil, tablet ou calquer outro dipositivo) debería estar prohibido. Pola contra, Javier mais eu estamos dacordo co uso de libro dixital e tablet, por varias razóns: maior comodidade, mesma eficiencia e menor peso para os rapaces.
Coincidimos en que o emprego das TIC debe facerse dunha forma responsable e organizada. Con respecto ao uso do móbil, pensamos en que debe estar completamente prohibido, por unha sinxela razón: para evitar posibles problemas de bullying.





Lingua A vs. Lingua B

Este foi o tema que menos debatimos porque tanto no meu grupo coma a nivel de clase todos opinamos o mesmo. Cremos que na clase de lingua estranxeira a lingua vehicular debe ser a lingua B  (inglés ou francés), xa que un dos nosos obxectivos como docentes é que o alumnado estea o maior tempo posible exposto a esa lingua. Evidentemente, o nivel de lingua que empreguemos variará en función do nivel, pero coincidimos en que este sistema favorecerá a súa aprendizaxe. Soamente contemplamos o uso da lingua A (galego ou castelán) en niveis iniciais, pero de xeito moi puntual.

O debate pareceume moi interesante e fructífero, aínda que se me fixo curto. Serviunos para facernos unha idea sobre como pensamos no relativo a estes temas e sobre como seremos como docentes. Ademais, proximamente imos comezar as prácticas do Mestrado polo que xa temos unhas nocións básicas de actuación.