2ª sesión con Luz

Nesta segunda sesión traballamos as competencias básicas.

As competencias básicas son aquelas que debe desenvolver un alumno ou unha alumna ao longo de todo o ensino obrigatorio (primaria e secundaria) para poder lograr a súa realización persoal, exercer a cidadanía activa, incorporarse á vida adulta de xeito satisfactorio e ser capaz de desenvolver unha aprendizaxe permanente ao longo da vida. 

Foron definidas no proxecto DeSeCo (Definición e Selección de Competencias) e establece que unha competencia abrangue máis que coñecemento e habilidade. Serven para facer fronte ás demandas e necesidades tan complexas da sociedade actual.

 Integra os tres tipos de saberes: Saber teórico (coñecemento), Saber pragmático (habilidades e destrezas) e Saber ser (actitudes).

Deste xeito, a adquisición das devanditas competencias non é exclusiva dunha material en concreto; cada unha das áreas contribúe ao desenvolvemento de diferentes competencias e, á súa vez, cada unha das competencias básicas alcánzase como consecuencia do traballo en varias áreas ou materias.

Na clase de lingua estranxeira non se traballa única a exclusivamente a competencia lingüística, posto que ao traballar en temas transversais, trabállanse varias competencias.

As competencias básicas son 8:

1. Competencia lingüística
2. Competencia matemática: ademais da lingüística, en clase de lingua estranxeira tamén podemos traballar esta competencia, mediante as medidas de peso, a lonxitude, os números, as horas, as porcentaxes, séculos, etc. 
3. Competencia de coñecemento e interacción co mundo físico: pódense traballar temas que foemnten esta competencia; por exemplo coa xestión de residuos, o cambio climático, a colonización (xeografía), etc.
4. Competencia dixital: coa implantación das TIC no sistema educativo, esta competencia podémola considerer inherente á clase de lingua estranxeira.
5. Competencia social e cidadá: esta competencia pódese traballar en temas como o tratamento de cortesía, mecanismos de participación (levantar a man para falar, non imterromper cando alguen fala), traballo en grupo, diferenzas culturais.
6. Competencia cultural e artística: esta competencia é a máis vinculada á aprendizaxe da lingua estranxeira, despois da lingüística. No proceso de aprendizaxe vai implícito o coñecemento da cultura, xa que non se traballa a base de exercicios, senón de temas (O medio ambiente, as novas tecnoloxías, os deportes, os viaxes); eses temas serven de base para dar a coñecer a cultura meta.
7. Competencia para aprender a aprender.
8. Competencia da autonomía e iniciativa persoal: estas dúas últimas competencias son de especial importancia, contribúen ao desenvolvemento dunha persoa, dándolle a capacidade de aprender por si mesmo e de ser autónomo.

 Para entender cómo podemos traballar varias competencias na clase de lingua estranxeira, Luz ensinounos varios materiais moi interesantes, entre eles un vídeo sobre o consumo de auga e un traballo de colaboración entre dúas materias (Inglés e Informática).

Como a clase anterior, esta tamén me resultou moi produtiva porque traballamos os contidos dunha forma moi práctica. Penso que desta forma entendemos mellor como debemos enfocar as clases de lingua estranxeira: transversal, dinámica e enriquecedora.